प्राथमिक तहको लागि १३ हजार ९३ शिक्षकका लागि विज्ञापन खुल्यो
काठमाडौं । प्राथमिक तहको १३ हजार ९३ शिक्षकका लागि विज्ञापन खुल्ने भएको छ । शिक्षक सेवा आयोगले प्राथमिक तहको तृतीय श्रेणीको शिक्षकका लागि बुधबार विज्ञापन आह्वान गर्ने भएको हो ।
आयोगले खुलातर्फ १३ हजार ९३ पदका लागि विज्ञापन गर्न लागेको जानकारी दिएको छ । विज्ञापन बुधबारको गोरखापत्र र आयोगको वेबसाइटमा अपलोड गरिने छ ।
इच्छुक उम्मेदवारले भोलिदेखि माघ १४ गतेसम्म नियमित शुल्कमा र माघ २० गतेसम्म दोब्बर शुल्कमा परीक्षा आवेदन फाराम भर्न सक्ने आयोगले जानकारी गराएको छ । परीक्षा आगामी चैत्र २० गते सञ्चालन हुने आयोगका एक अधिकारीले बताउनुभयो ।
आयोगले यसअघि माध्यमिक तहको १ हजार ५ सय ४७ शिक्षक र निमावि तहको लागि दुई हजार ५९८ पदका लागि विज्ञापन गरिसकेको छ । आयोगले आगामी चैतमा सबै तहको लाइसेन्स परीक्षाका लागि विज्ञापन गर्ने गृहकार्य गरिरहेको जानकारी दिएको छ ।
