नेपाल प्रहरीका प्रहरी उपरीक्षक भीमबहादुर दाहाल ११ दिनदेखि प्रहरीको हिरासतमा छन् । सवारी ज्यान मुद्दामा पक्राउ परेका उनी ११ दिनदेखि झापा प्रहरीको नियन्त्रणमा रहेका हुन् ।
दाहालले चलाएको स्करपियोको ठक्करबाट एक जनाको मृत्यु भएपछि प्रहरीले उनलाई २४ कात्तिकमा नियन्त्रणमा लिएको थियो । दाहाल नेपाल प्रहरी प्रदेश कार्यालय धरानमा कार्यरत छन् ।
WOW 250*250
दाहालले चलाएको मे १ च ७८३९ नम्बरको स्करपियो र मे १० प १६६९ नम्बरको मोटरसाइकल पूर्व–पश्चिम राजमार्गको कन्काई नगरपालिका–८ बिरिङ पुलमा ठोक्किएर दुर्घटना हुँदा मोटरसाइकलमा सवार कमल गाउँपालिका– ६ का १८ वर्षीय अनिल मडीको मृत्यु भएको थियो । घटनापछि पक्राउ परेका प्रहरी उपरीक्षक दाहाललाई म्याद थप गरी हिरासतमा राखिएको जिल्ला प्रहरी कार्यालय झापाका डिएसपी खगेन्द्रप्रसाद रिजालले जानकारी दिए ।
पूर्वबाट पश्चिमतर्फ आउँदै गरेको मे १ च ७८३९ नम्बरको स्कारपियो र विपरीत दिशाबाट जाँदै गरेको तीन जना सवार मे १० प १६६९ नम्बरको मोटरसाइकल २४ कात्तिक राति ९ बजे ठक्किएर दुर्घटना भएको थियो । स्करपियो दाहालले चलाएका थिए । दुर्घटनामा मोटसाइकल चालक कमल गाउँपालिका– ६ का १९ वर्षीय खगेन्द्र ताजपुरीया सामान्य घाइते भएका थिए । मोटरसाइकलमा सवार १८ वर्षीय पुजन राजवंशी र १८ वर्षीय अनिल मडी गम्भिर घाइते भएका थिए । मडीलाई अस्पताल पुगेलगतै चिकित्सकले मृत घोषित गरे ।
दुवै सवारी लापरवाहीपूर्ण तरिकाले चलाएका कारण दुर्घटना भएको प्रहरी स्रोतको दाबी छ । घटना लगतै दाहाललाई इलाका प्रहरी कार्यालय अनारमनीले नियन्त्रणमा लिएको थियो । उनीमाथि दश दिनको म्याद थप गरी अनुसन्धान भइरहेको डिएसपी रिजालले बताए ।
Koshi online -cp
