रामपुर– सप्तकोशी नदीले छुट्याएको सुनसरी र उदयपुरका धार्मिक तीर्थ जोड्न झोलुङ्गे पुल लगाइने भएको छ ।
सुनसरीको चतराधाम र उदयपुरको बेलकातर्फ पर्ने महाङ्काली मन्दिरलाई झोलुङ्गे पुलले जोड्नेछ । धार्मिक र पर्यटकीय दृष्टिले पनि झोलुङ्गे पुलको निर्माण महत्वपूर्ण रहेको स्थानीय पर्यटन व्यवसायी रमण भट्टराई बताउँछन् ।
दुर्बासाघाट मल्टिस्पान ट्रेल ब्रिज नाम दिइएको झोलुङ्गे पुल योजना एमएस जगदम्वा निर्माण कम्पनी काठमाडौंले ठेक्का पारेको छ ।
स्थानीय पूर्वाधार विकास विभाग सस्पेन्सन ब्रिज डिभिजन ललितपुरका अनुसार भ्याटबाहेक ठेक्काको कबोल रकम ५ करोड ३९ लाख ३९ हजार तीन सय २७ रुपैयाँ छ । यस्तै भ्याटसहित ६ करोड २६ लाख ९ हजार ८५ रुपैयाँ ९४ पैसा लागत रहेको छ ।
चतरास्थित कुम्भस्थल दुर्वासाघाटदेखि महाङ्काली मन्दिर जोड्न दुई वटा झोलुङ्गे पुल निर्माण हुँदै छन् । कोशीको पूर्वी भङ्गालोमा उपभोक्ता समितिमार्फत् क्रमागत बजेटमा निर्माण हुँदै गरेको झोलुङ्गे पुल निर्माण सम्पन्न हुनुअगावै बाढीले बगाएको छ । गत बर्खामा आएको बाढीले बगाएपछि उक्त योजना सुरुदेखि सञ्चालन गर्नुपर्ने अवस्था छ ।
