उदयपुरको बेलका नगरपालिकाको आठौं नगरसभा आगामी आर्थिक वर्ष २०७८/७९ को बजेट, नीति तथा कार्यक्रम पारित गर्दै सम्पन्न भएको छ । नगरसभाले नगरप्रमुख दुर्गा कुमार थापा द्वारा १० असारमा आठौं सभाको पहिलो बैठकमा प्रस्तुत बजेट, नीति तथा कार्यक्रम सर्वसम्मत पारित गरेको हो ।
नगरसभाले १० असारमा पेस भएको बजेटमा केही संशोधनसहित ७१ करोड ६९ लाख ४७ हजार रुपैयाँ बराबरको बजेट पारित गरेको छ।
नगरसभाले ” सम्मानित जीवन , समावेशी पुर्वाधार, समाजबाद उन्मुख बेलका नगर” उत्पादनमा समर्थन , पुर्वाधार प्रबर्द्धन ” नारासहित विगतका नीति तथा कार्यक्रमलाई निरन्तरता दिई लोक कल्याणमा आधारित कार्यक्रम सञ्चालन गर्ने गरी तयार पारिएको नीति तथा कार्यक्रम पारित गरेको छ ।
नगरसभाबाट पारित नीति तथा कार्यक्रममा कृषिको आधुनिकीकरण , गुणस्तरीय तथा प्राबिधिक शिक्षा ,भु उपयोग तथा भुमि ब्याबस्थापन, जलस्रोत तथा उर्जा बिकास, नगरपालिकाको गौरबका योजनाहरु बेलका नगरपालिका प्रशासनिक भवन निर्माण ,रामपुर,भागलपुर,आम्बासी सडक निर्माण , कोल्ड स्टोरेज निर्माण , बिधुतिय नगरबस सन्चालन,औद्योगिक ग्राम निर्माण , ज्येष्ठ नागरिकको निःशुल्क स्वास्थ्य बिमा गर्ने, एक गाउँ एक उत्पादन कार्यक्रम सञ्चालन गर्ने, आधुनिक पशुपक्षी वधशाला तथा कोल्डस्टोर स्थापनाका लागि पहल गर्ने उल्लेख छ ।
नगरसभा बैठकले विधायन समितिका संयोजक एवं वडा नम्बर ४ का वडाअध्यक्ष दिपक दंगाल द्वारा प्रस्तुत विनियोजन विधेयक सर्वसम्मत पारित गरेको छ ।
नगरसभा बैठकको समापन गर्दै नगर प्रमुख थापाले सभा सम्पन्न बनाउन साथ दिने नगरसभा सदस्यसहित सबैलाई धन्यवाद दिए । समृद्ध नगर बनाउने अभियानमा अहिलेसम्म सबैसँग सहकार्य गर्दै आएको र आगामी दिनमा पनि यसलाई निरन्तरता दिने थापाले बताए ।
कोभिड-१९ को जोखिमपूर्ण परिस्थितिमा अग्रपंक्तिमा रहेर सेवा गर्ने स्वास्थ्यकर्मी, सुरक्षाकर्मी, सरसफाइकर्मी, जनप्रतिनिधि, कर्मचारीलगायत सबैलाई धन्यवाद दिए । बैठकमा नगरपालिकाकि उपप्रमुख राज कुमारी चौधरीले ४ वर्षदेखि सर्वसम्मतिले बजेट पारित गर्दै आएको र यस पटक पनि सर्वसम्मतिमै बजेट पारित भएकोमा खुसी व्यक्त गरिन् ।
नगरपालिकामा राम्रो कार्य गर्नेलाई प्रोत्साहन व्यवस्था गरिएकाले बजेटको समयमै कार्यान्वयन गर्नुपर्नेमा उनको जोड छ । नगरपालिकाका प्रमुख प्रशासकीय अधिकृत अर्जुन निरौलाले नगरसभाबाट पारित बजेट, नीति तथा कार्यक्रमलाई आर्थिक वर्षको सुरुदेखि नै प्रभावकारी रूपमा कार्यान्वयनमा लैजाने बताए ।
