उदयपुरको बेलका नगरपालिका–३ स्थित कोशी जनता माध्यमिक विद्यालयमा पढ्ने कविता सुनुवार र १६ वर्षीया गिता (नाम परिवर्तन) मिल्ने साथी हुन् । मंगलबार विहान ट्युसन पढ्न सँगै गएकी कवितालाई गिताले योजनाबद्ध रुपमा हत्या गरेको आरोप लागेको छ ।
बेलका नगरपालिका–६ स्थित बुद्धचोक घर भएकी १६ वर्षीया कवितालाई गिता र उनको ठुलो बुवाको छोरा बिनोद ढकाल मिलेर हत्या गरेको प्रहरीको अनुसन्धानबाट खुलेको छ । स्कुलबाट कविताको घर ३ किलोमिटर पर छ । गिताको घर करिब साढे ४ किलोमिटर पर पर्छ ।
धेरै दिनपछि मंगलबार एसइईको तयारी कक्षा लिन गएकी गिताले १९ वर्षका दाई बिनोदलाई पनि सँगै लगिन् । सोही क्रममा बाटोमा कविता भेटिइन् । स्कुलतिर जाँदै गर्दा बाटोमा फालिएको फोहोरका थुप्रोबाट बिनोदले बियरको खाली बोत्तल टिपे । सो कुरा कविताले थाहै पाइनन् । अचानक सो अभियुत्तले मिलेमतोमा हानेको बियरको बोत्तल टाउकोमा बज्रिएपछि कविता ढलिन् ।
बियरको बोत्तलले हिर्काएर हत्या गरेपछि करिब ४० मिटरजत्ति घिसारेर स्थानीय यसोदा खोला छेउमा शव फालेर आरोपीहरु भागेको खुलेको छ।
कविता र गिता एउटै कक्षामा पढ्ने र आपसमा मिल्ने साथी थिए । मिल्ने साथी भएपनि आफूलाई व्यवहारमा ‘डोमिनेट’ गरेको र आफ्नो कुरा सवैतिर भन्ने गरेको आरोप लगाएर गिताले मृतकसँग ‘इगो’ साँधेको पाइएको छ ।
हत्या गर्ने योजना रहेको हुनाले बाटोमा गिताले कवितासँग कुनै विवाद नगरेको पाइएको छ।
स्थानीयले बिहान ७ बजेतिर शव देखेपछि प्रहरीलाई खबर गरेका थिए । हत्यापछि गिता ट्युसन पढ्न नगएर घरतिर गएकी थिइन् । मृतकको शव घिसारेर व्यवस्थापन गर्दा चोट लागेको हुनाले आरोपी विनोद मेडिकलमा गएर घुँडामा व्याण्डेज गरेर फर्किएको फेला पारेपछि इप्रका रामपुरको प्रहरी निरीक्षक तेज बहादुर दाहालको नेतृत्वले पक्राउ गरेको थियो ।
त्यही दिन साँझ ५ बजे कविताका बुवा कृष्ण सुनुवारले सरिता र विनाेदविरुद्ध इलाका प्रहरी कार्याल रामपुर ठाेक्सीलामा किटानी जाहेरी दिएका थिए । पक्राउ परेका दुई जनामध्ये प्रहरीले विनाेदलाई मात्र सार्वजनिक गरेकाे छ । सरिताचाहिँ बालिका भएकाले उनलाई सार्वजनिक नगरिएकाे बताइएको छ । जिल्ला अदालत उदयपुले सरिताकाे हकमा २२ चैतदेखि लागू हुनेगरी पाँच दिन र विनाेदलाई सात दिन थुनामा राखेर थप अनुसन्धान गर्न अनुमति दिएकाे छ ।
