कोसीटप्पु वन्यजन्तु आरक्ष क्षेत्रमा रहेको मकुना नामको हात्ती विद्युतीय धरापमा परेर मरेको छ । आरक्षका प्रमुख संरक्षण अधिकृत अशोककुमार रामका अनुसार किसानले धान खेतमा राखेको विद्युतीय धरापमा परेर उक्त हात्ती मरेको हो ।
घटनास्थल आरक्षको हात्तीसारबाट करिब ८ सय मिटर दूरीमा पर्छ । उक्त हात्तीले गत वर्षको पुसदेखि आरक्षको मध्यवर्ती क्षेत्रका बस्तीमा पसेर धेरै व्यक्तिको ज्यान लिएको छ । बस्तीमा पसेर विध्वंस मच्चाउन थालेपछि आरक्षले गत पुसदेखि रातभरि मकुनाको रेखदेख गर्दै आएको थियो ।
बस्तीमा नपसोस् भनेर रातभरि ट्याक्टरमा नेपाली सेना र प्राविधिकले गस्ती गर्दै आएका थिए ।
रामका अनुसार शनिबार राति १ बजेसम्म उक्त हात्ती आरक्ष आसपासमै थियो । राति धेरै समय नदेखिएपछि खानतलासी गर्दा खेतमा लडेको अवस्थामा भेटिएको उनले जानकारी दिए । घटनाबारे विस्तृत अध्ययन भइरहेको उनले बताए ।
मकुनाले आरक्षको मध्यवर्ती क्षेत्रका बस्तीमा २० जनाभन्दा बढी मानिसको ज्यान लिएको थियो । ज्यान जानेमा बेलका नगरपालिका का ७ जना भन्दा धेरै रहेका छ्न ।
